LOS JUDIOS DE “GIRONA” TREZLADADO AL LADINO POR SIMON GERON

In: http://esefarad.com/?mkt_hm=52&p=79835&utm_source=email_marketing&utm_admin=22882&utm_medium=email&utm_campaign=Boletin_Semanal_eSefarad

Gerona. Visitando el Barrio Judio

Keridos amigos i amigas

Tengo la impression ke mis avuelos de la parte de mi padre vienen de “Girona/Gueron/Gerona”. Tengo la alkunya de esta sivdad ke me da esta impression. En mis viajes a Espanya me fui a ver la sivdad ke oy la yaman ‘Girona” i ke antes se yamava “Gueron”. Me kamini por El Barrio Judio Antiguo en las kayes estrechas i oskuras ande nuestro puevlo bivio kontinuamente desde 890 asta 1492. Tengo en mi mano una revista ke konta la istoria de los Judios de “Girona” publikado por “Patronal Municipal “CALL DE GIRONA “lnstitut d’Estudio Nachmanides”

Saludes a todos

——————————————————————————-

LOS JUDIOS DE “GIRONA”

Gerona tuvo un heritaje kontinual de 600 anyos de la presencia Judia, deshando trazas profundas, markando la kultura i ekonomía desde 890 asta 1492. El Puevlo Judio paso por un tiempo doloroso en la Istoria Kolektiva del “CALL’ en la parte antigua de la sivdad ke adientro fueron eskritos unos kapítulos signifikantes en la istoria i en el pensamiento umano.

EL CALL

La Istoria de los primeros Judios en Girona es perdida en tiempo. Desde el empesijo muchos sovrebivientes de la destruksión de Jerusalem vinieron a Catalunia. Se topavan ayi Judios mismo antes de la invasión de los Sarracenos. El establesimiento empeso mas en 889 i 890. 25 famiyas Judías de las rejiones alrededor tomaron las kasas viejas de los saserdotes serka de la iglesia ke eran konstruidas a través la katedral. Se espandieron de ayi a los sitios abasho la sivdad kreando el “CALL”. La époka mas gloriosa era en el tiempo de “ALJAMA/Barrio Judio.” kon una poblasión de 300 personas. Los Judios tuvieron influensia  grande i sus enseniamientos viajaron muy leshos. La vida en la “Aljama” pasava alrededor de la sinagoga en sitios diferentes i en tiempo. La ultima sinagoga ke se vendió en 1492 komo el resultado del dekreto de expulsión tenia un ospital i banios rituales.Todas las aktividades se pasavan en la sinagoga ke se yamava “Casa de Jacob”. Todo era echo para la praktika de la relijion. Se topa mismo una plaka antigua kon las palavras “Ven i sigue La Luz de Yahweh. El Dio es nuestro refujio. Avre las puertas de los justos/tsadikim ke guardan la fe. Es kon esto ke se inche uno de buendad i la santidad del Templo”

SIVDAD ADIENTRO SIVDAD

La “Aljama” de Girona komo en todas las komunidades Judias de La Korona de Catalunia i de Aragon era protejida por el Monarcho kontra un tributo finansiero. Kaiya basho la autoridad del Soverano. El apuntava un alkalde ke governava kon varios miembros. Era solamente responsable al rey. Asi la ‘Aljama” era un governo independiente en el korasón de Girona. El “JURATS” tenia ninguna jurisdiksion. De manera inevitable el sistem tuvo konfliktos. El rey nunka kijo perder en este asunto i puedia intervenir en kestiones de la munisipalidad. JURATS era ovligado a protejer a los Judios i otros sivdadanos i en los 6 siglos tomaron lugar unas modifikasiones de ko-existensia. Parese ke las relasiones entre los vizinos fueron buenas asta el Siglo 11. Avian mismo kasamientos entre Judios i Kristianos. Después empesó la intoleransia, attakaron a los Judios i tomaron sus kasas i bienes, sus tierras i tombas

Se paso en 1276, 1278, 1285, 1331, 1348 ,1391 ,1413 i 1418 a base de venganza. Se pensava ke los Judios los rovavan en sus prestamientos de dinero. Se metían selosos de los Judios privilejiados ke tenian poder ekonómiko. Existia en mismo tiempo el fanatismo de la parte de los klerikos ke estavan en la kavesa. Echavan piedras a las kasas de los Judios i destruían las vinias i los jardines afuera de las paredes de la sivdad. Avian kavzos sangrientas komo se paso en Augusto 1391 kuando un grupo entro en el CALL i mato a 40 personas antes ke interviene el JURATS. Muchos Judios partieron de ayi. Otros se konvirtieron sin sinseridad. Al fin el CALL se izo un Getto. JURATS los forzo a tener las ventanas i puertas serradas dando al “Carrer De La Forca”. Era un kamino de prosesiones i funerales. Se kedava una sola entrada al Barrio Judio. Después vinieron otras restriksiones en 1442 i serraron el CALL i en 1445 no era permitido. de alkilar kasas a los Judios i de darles un lugar en el merkado. En el mismo anio los Judios no puedian salir afuera sin metersen en sus vestidos tradisionales komo un chapeo puntado i un chaleko. Se izo kon la idea para ke sean konosidos por todos komo Judios. Si no les azian pagar 100 vezes mas de lo ke ganavan. La Korona tuvo ke intervenir en 1453 kuando el Inkisitor kijo echar afuera del país al “Patriarca Benevist Samuel”. Ma esto no pudo intervenir en las problemas ke existían komo los prosesos sovre las devdas, la venta de propiedades basho una presión i en la restriksion de los privilejios ke tenian. Entrava ayi también la Campagna Evangélica ande los konversos se avían konvertido por un motivo finansiero.

REKONOSIDO POR EL MUNDO

Malgrado la segregazione, los Judios kontinuaron a tener influensia sovre la vida ekonomika de la sivdad. Unos nombres importantes aparesen en la istoria de ves en kuando. “Halevi. Desmestre, Ravalla, Cresques, Bonjorn, Sabarra, Caravita i Falco”  Aparte de darsen a la ekonomía i la industria eran adjentes i promotores, tenian aksiones i bonos i seguridades. Azian prestamientos, arekojian los impuestos i espekulavan. Los dokumentos mostran ke kompravan kasas i tierras de los Kristianos desde el Siglo 11, o obtenían a estas kosas komo krédito i las reposesionavan. Ma la mas grande kontribusión era Kultural al punto de azer a Girona El Sentro Espiritual konosido por el mundo. Se azían estudios teolójikos intensivos ke se developaron mas en el Siglo 12 i 13. El Mistisismo Judio  transendia de la Ley Antigua de kualo vino la “Kabbalah/Colleccion de teorias esoteriskas, bushkando a entender el misterio del Dio” en interpretando las palavras de las eskrituras sagradas. Tenian la vista de un mundo “Infinito” del Dio. La eskola de “Carrer De La Forca” produsio el primer grupo de expertos en el  medio del Siglo 13. Malgrado el kontakto kon otras eskolas Europeas de pensamiento, la versión de Girona guardo su karákter orijinal i resivio un prestijio mundial. En estos anyos la Filosofía Kabbalistika ke nasió en las kayes estrechas i oskuras de Girona,illumino a todo el Mundo Judio i a la sivdad de Girona. Un grande Rabino era “Moises Ben Nachman o Nachmanides, nasido en 1194. Era mediko, filosof i experto del Talmud. Eskrivia Poesías Kabbalistikas. De su kasa en el CALL salieron figuras komo “Jonas Ben Abraham, Jonas Megirondah, Abben, T ibun i Isaac Halevi”.

EXPULSION DE LOS JUDIOS DE ESPANIA

En Marzo 31/1492, Ferdinand i Isabel de Castilla i de Aragon konosidos komo “Los Reyes Católicos” introdusieron el edikto de expulsión de los Judios. Tuvieron ke eskoker entre ser konvertidos o ser expulsados. Este Edikto Real yego a Cataluña al fin de April i la Aljama estava en dekadensia. Los resorses umanos avían disminuido. La expulsión forzada era regretada por los Kristianos porke la separasión de las 2 komunidades no tuvo efekto en un tiempo de koexistensia en paz. El komersio era re-establesido i JURATS tenia poko entusiasmo a kumplir los ordenes. El 20 Julio subito se proklamo ke los Judios puedian vender sus bienes sin tener espanto de ser kastigados. Las kasas se vendieron asta el 29 Julio i al 30 todos los Judios avían partido del CALL. En 4 Augusto JURATS dio el permiso a los duenios nuevos de demolir las puertas i las paredes serradas para ke este sitio sea komo los otros, libre i aksesible. Los ke se konvirtieron se vieron harvados por La Inkisisión ke korria detrás los herétikos  en 1490. Existe evidensia ke entre 1491 i 1505, 84 residentes fueron yevados a la Korte i ke tomo lugar 15 “Auto-Da-Fe”s en Girona. La Linia Judea era effazada por los Inkisidores. Al partir de la sivdad los Judios pudieron ver por la ultima ves las kasas ande tenian lo ke kontava de sus ancestros. Todo esto fue preservado asta oy. En una tomba en el Monte MONTJUIC esta eskrito “El se murió en este día malo kon un korasón puro i se yama “R.Reuben, ijo de R.Hanina”. Ke su memoria sea por la vida eterna i ke el se torne a la Kasa Eterna “Fecha AV 5013” del día de Kreasión. “Ke su alma sea atada a los bivos i leales.”


Trezladado por Simon Geron
Sydney

En onor de sus abuelos ke bivian en Espania.