MUESTRA LINGUA: AMISTAD ENTRE PERSONAS DE RELIJYONES DIFERENTES POR EDMOND COHEN

In: http://esefarad.com/?p=75045

edmond-cohen1Keridos amigos,

La emisyon ke apareji para djueves va ser sovre la amistad entre personas de relijyones diferentes. Lo manko ke se pueda dizir es ke no uvo syempre esta amistad, i ke mozotros los djudyos lo savemos mijor de los otros. Ama yene uvo djente ke lucho i ke kontinua de luchar en favor de esta amistad, i es de esta djente ke kije avlar..

Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr  Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145

Saludos a todos
Edmond Cohen Paris Fransya


AMISTAD ENTRE PERSONAS DE RELIJYONES DIFERENTES

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Por empesar,  vos akodro ke el proksimo atelye de konversasyon de Vidas Largas se tendra el martes 6 de desyembre, a las  dos i medya, en el Centre Communautaire.

Vos akodro tambyen ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir sea en direkto, sea kuando se kyere, eya sola, kale klikar en el sityo de Radio J, sovre Emissions, i irse en pajina 5, aya se topa la miya…o no se topa. Estas ultimas semanas, no se topo. Ya entenditesh ke esto no depende de mi. http://www.radioj.fr/node/145

Estos tyempos, en Fransya i en munchas otras partes del mundo, ombres de una relijyon aharvan i matan a ombres de una otra. En Yugoslaviya, en todo el Medyo Oryente, vemos o vimos muzulmanos matar a djudyos i kristyanos, o matarsen entre eyos por razones relijyozas, sunitos kontra shiitos, i lo todo kon un fanatismo sin dinguna piyadad. En Fransya venimos de akodrarmos de los atentatos del 13 de novyembre 2015 en Paris, despues tendremos de akodrarmos de los atentatos del 14 de julyo 2016 en Nice, sin avlar de munchos otros.

I mismo kuando no ay muertos, ay un odyo ke se espande en internet, i afuera de internet, manifestasyones en Paris kontra los djudyos, puedemos dizir ke el syelo se oskurese mas i mas.

Oy me vino la idea de avlarvos en mi emisyon de los ombres de relijyon ke, sin desharse deskorajar por todo lo ke se esta pasando, ovran kadal diya para la paz i la amistad entre djudyos, kristyanos i muzulmanos.

les_colombes-disrael_samy_cohenEsta idea de avlarvos oy de esto no me vino ansina, de si para si. Uvo tres okazyones ke me dyeron esta idea. La primera en vedra no trata direktamente de relijyon, es el livro ke vyene de salir eskrito por mi amigo Samy Cohen, intitolado Les colombes d’Israël, Enquête sur le camp de la paix (Las palombas de Israel, enkuesta sovre el kampo de la paz). En este livro, Samy Cohen mos dize ke en Israel el kampo de la paz kon los Palestinyanos, afillu si muncho se aflako, no se muryo: a la kontra, ay un alay de chikas asosyasyones, de chikos movimyentos, ke, aunidos, reprezentan oy mismo una fuersa en favor de la pas i mismo de la amistad kon los Palestinyanos.

La sigunda okazyon es la vijita ke arresivi este lunes en mi kaza de una mujer, profesora de istorya, ke vino a verme para una entrevista sovre las djustas ke me salvaron durante la gerra. Esta mujer aze parte de la asosyasyon Amitiés judéo-chrétiennes (amistades djudeo-kristyanas), asosyasyon fundada poko tyempo despues de la gerra.

La tresera okazyon es la muerte de dos ombres de paz: en el Canada Leonard Cohen, ke fue syempre al lado de Israel (sovre todo durante la gerra de Kipur ande paso dos mezes al lado de Tsahal) i syempre kanto para la paz; i en Fransya la muerte de Malek Chebel, muzulmano ke, el tambyen, era syempre del lado de la amistad i de la paz.

leonard_cohen_en_israel_1973

Por kualo empesar?

Puede ser seriya bueno de empesar por akodrar ke, en teoriya, es muy kolay, kuando biven en  djuntos djentes de relijyones diferentes, ke kada uno tenga su relijyon sin okuparse de la del otro, i ke kada uno, no solo biva en paz kon el de otra relijyon, ama mizmo tenga amistad verso el.

No solo es kolay en teoriya, es tambyen kolay en praktika, i orozamente se vido munchas vezes en la istorya.

Por egzemplo, en lo ke se yamo la edad de oro en la Espanya, ke va mas o menos de los siglos 11 a 13, i ke va mas o menos de Hasday ibn Shaprut, nasido en 915, vizir de fakto del Khalif Abd AlRahman III, asta la rueda amariya en 1231 en la parte katolika de Espanya, es vedra ke el oro de esta edad no fue syempre tan brilyante para los djudyos, kon las matansinas de 1066 en Granada, la yegada de los Almoravides en 1086, o de los Almohades en 1146 (i la fuida de Maimonides en 1151). Ama yene mos olvidamos un poko estas angusyas, ke son pokas kozas en komparazon de las matansinas ke van afitar mas despues en 1391, i mos akodramos del rey Alfonso VII de Castilla, en el siglo 12, ke se yamava el mismo, kon orguyo, “prinsipe de las tres relijyones”.

Es vedra ke uvo en Espanya un tyempo ande los savyos muzulmanos, kristyanos i djudyos bivyeron i lavoraron en djuntos, kon respeto i amistad. I mismo del tyempo de Maimonides, a la yegada de los Almohades, kale akodrarse ke si Rambam se pudo fuir, es grasyas al ayudo i la amistad de sus amigos muzulmanes Abbas i su ijo Kader.

Esto todo para amostrar ke la amistad entre kristyanos, djudyos i muzulmanes no es solo un suenyo, ya egzistyo en munchas okazyones. I en 1492, kuando los djudyos fueron echados de Espanya por los katolikos, no kale olvidar ke fue el Sultan Beyazit II, Khalif del Islam, ke los akojo, permityendo a estos djudyos de kedarsen en Turkiya no por un anyo o dos ama por sinko siglos, en paz i amistad kon los muzulmanes.

Malorozamente, es vedra tambyen ke los tyempos kyetos de amistad son la eksepsyon i ke la regla son los tyempos de odyo. Uvo tyempos en Fransya ande los katolikos i los protestantes teniyan la misma iglesya. El kura aziya la misa en una parte de la iglesya i los protestantes en otra parte. Ama malorozamente esto fue una eksepsyon en medyo de unas gerras dichas de relijyon kon, entre otras, la matansina de los protestantes en la noche dicha de la Saint-Barthelemy, el 24 de agosto 1572 en Paris, i los diyas i semanas ke sigyeron en la Fransya entera (komo fue kontra los djudyos en Espanya en 1391).

Un siglo antes de 1391, en 1280, Abraham Aboulafia aprovo de ir a ver el papa Nicolas XIII para ke aga kedar las negriguras kontra los djudyos, ama antes mismo de verlo, fue aferrado, djusgado i kondenado a muerte. Fue yene liberado kon la muerte del papa.

Se puediya pensar, kon la lucha de los filozofos inglezes i fransezes en el siglo 18 en favor sino de la amistad a lo manko de toleransya entre djente de relijyones diferentes, ke se eskapo por la emansipasyon de los djudyos en la Evropa entera durante el siglo 19, ke el odyo kontra los djudyos era koza eskapada.

Ama vinyeron los eskritos antisemites  de sosyalistos komo Fourier o Proudhon, seguidos por los de Drumont, i por el echo Dreyfus.

Es vyendo el antesimitismo en Fransya ke Theodor Herzl penso ke kaliya azer kualkyer koza. Antes de pensar a un estado djudyo, penso, komo Aboulafia, ir a ver el papa i empeso por embiyar una letra al arkiovispo de Viena, sin obtener dinguna repuesta. Se fue yene a ver el papa Pio X, sin obtener de el el ayudo ke asperava. Es despues ke troko de politika i tomo la idea, ke ya egzistiya antes de el, de un estado para los djudyos.

Kale dizir ke en Amerika se fundo en 1927 el National Council of Christians and Jews (konsilyo nasyonal de kristyanos i djudyos), i grupos judeo-kristyanos se formaron en Afrika del Sur, Ingletyerra, Australia, Canada i Suisa, en jeneral paizes protestantes.

I vino la shoa en los anyos kuarenta. La shoa, ofisyalmente, no era kontra los djudyos por razones relijyozas, era por razones de rasa. Trokar de relijyon no serviya de nada.

Si uvo durante la shoa munchos ombres de iglesya, el mas konosido i aktivo syendo Jules Saliège, ovispo de Toulouse, ke protestaron fuerte kontra las persekusyones de los djudyos, kale rekonoser tambyen ke el papa Pio XII reusho a pasar toda la gerra sin pronunsyar una sola vez el byervo djudyo, afillu si izo eskonder en el Vaticano a munchos djudyos de Roma. Dinguna protestasyon ofisyala de su parte en favor de los djudyos, i por tanto saviya por el SS Kurt Gerstein lo ke se pasava en los kampos almanes.

En Fransya aviya un istoryano muy  konosido por todos los mansevikos, Jules Isaac, syendo ke eskrivyo despues de su kolega Albert Malet matado en la gerra en 1915, los livros de istorya “Malet i Isaac” para las eskolas, sovre los kuales todos los mansevikos, i yo komo los otros, mos ambezimos la istorya (al punto ke ay oy mismo una eskola en Fransya, no leshos de Paris, ke se yama “Malet Isaac”).

Este Jules Isaac, antes mismo ke su mujer i su ija sean deportadas i matadas, penso ke la primera koza de azer era de trokar el ambezamyento de la iglesya sovre los djudyos.

En 1946, dunke djusto despues de la gerra, este Jules Isaac, eskrive un livro muy importante: Jesus et Israël (ke sera puvlikado en 1948) segido en 1962, un anyo solo antes de su muerte, por el livro L’enseignement du mépris (el ambezamyento del despresyo). Jules Isaac amostra la responsabilidad de la Iglesya en la shoa, no por lo ke aviya echo o no echo, ama por tener ensuzyado el puevlo djudyo durante tantos siglos. Amostra komo el antisemitismo de los kristyanos, mismo si no eran mas kristyanos, era la konsekuensa de siglos de ambezamyento por la Iglesya del odyo i del despresyo de los djudyos.

Demanda a la iglesya de tomar en konsiderasyon 18 propozisyones lavando el puevlo djudyo de todas las negriguras traidas por eya.

Jules Isaac va ser oido.

En 1946 se tyene en Ingletyerra la konferensya internasyonala de Oxford, yamada Council of christians and jews.

En el enverano de 1947, en la sivdadika de Seelisberg, se tyene una otra konferensya internasyonala (17 paizes reprezentados) kon 28 djudyos inkluyendo, en mas de Jules Isaac, los hahamim Jacob Kaplan (ke sera poko despues haham bashi de Fransya), Alexandre Safran i Gabriel Vadnaï, 23 protestantes i 9 katolikos.

Esta konferensya va azer adoptar por los myembros kristyanos de la komisyon relijyoza, sin ke los djudyos se mesklen de la relijyon kristyana, los diez puntos dichos de Seeligsberg. Por manko de tyempo no vos vo meldar estos diez puntos, komo no vos meldi las 18 propozisyones de Jules Issac, ama ya entenditesh ke se trata de trokar el ambezamyento kristyano sovre los djudyos, en akodrando ke Jesus, su madre, sus disipulos, i los primeros kristyanos eran djudyos, ke no es el puevlo djudyo ke mato a Jesus, ets.

Despues de esta konferensya muy importante, se van a fundar en el mundo entero asosyasyones de amistad judeo-kristyana. En Fransya la asosyasyon es fundada en 1947. De parte de los djudyos los prinsipales fundadores son Jules Isaac, por siguro, ama tambyen el grande eskrivano Edmond Fleg. De parte de los kristyanos el primer prezidente de la asosyasyon fue Henri-Irénée Marrou, ama, asigun lo ke me konto la mujer ke vino a verme lunes, se peleo kon Jules Isaac porke no puediya achetar ke la Iglesya kristyana tenga una responsabilidad en la shoa, i despues de e, ke kedo prezidente un anyo solo, el prezidente va ser el eskrivano kristyano Jacques Madaule, ke kedo prezidente de1949 asta 1975.

En 1948 el Konsilyo ekumeniko de las Iglesyas deklara desde Amsterdam ke el antisemitismo es un pekado a la vez kontra el Dyo i kontra el ombre.

Jules Isaac, komo lo aviyan aprovado antes de el Abulafia i Herzl, se va ver el papa: Pio XII en 1949 i Jean XXIII en 1960. Esta vez a sido oido, i, komo lo savesh, Jean XXIII empeso a aparejar el konsilyo Vatican II, ke se tuvo en 1965 kon el papa Paul VI ke vino despues de el. Es en este konsilyo ke fue firmada el 28 de oktovre 1965 la famoza deklarasyon Nostra Aetate sovre la relasyon de la Iglesya kon las relijyones non kristyanas, aprovada por 2.281 bozes kontra 88.

No vos vo meldar esta deklarasyon ke es muy kolay de topar en kualkyer lingua sovre internet, ama ya entenditesh ke la idea es ke no kale mas ambezar el odyo de los djudyos, a la kontra rekomanda la “estima mutuala”.

Munchas vezes, agora, pasando delantre de la iglesya serka de la kuala yo moro en Paris, veo eskritas, en tyempo de Rosh Ashana, tabelas ande la iglesya dezea, por la okazyon de esta fyesta, “anyada buena a muestros ermanos djudyos”.

Kale dizir ke la Fransya voto dos leyes, la primera, en 1972, kon la unanimidad, kondenando komo delikto penal toda palavra kontra los djudyos, i la sigunda en 1990, yamada ley Gayssot, kondenando komo delikto penal toda kontestasyon de la shoa.

Kon esto todo es vedra ke el antisemitismo kristyano se aflako bastante.

Por lo tanto, no dezaparesyo. En primero, kale dizir ke los katolikos integristos (sedevakantistos o de la Hermandad San Pio X) no achetaron el konsilyo Vatican II. En jeneral, estos katolikos refuzan la deklarasyon Nostra Aetate i kedan antisemites.

De otra parte, ay kristyanos ke no son partikolarmente relijyozos, ama ke son partikolarmente antisemites, i ke son los antisemites rasistos. Estos son munchos, i me demando si no son mas i mas.

Dunke lo ke se puede dizir es ke la lucha para una amistad entre kristyanos i djudyos dainda no se eskapo, afillu si la iglesya i el papa izyeron muncho para enderechar las kozas.

Malorozamente, una vez ke el antisemitismo kristyano se tyene muncho aflakado, un otro antisemitismo ke no asperavamos nasyo i se engrandesyo, es el antisemitismo muzulmano. Yo pensava avlarvos de esto en esta emisyon, ama no me keda bastante tyempo para esto.

Me kontentaré de dizirvos ke egzisten oy en Fransya a lo manko dos asosyasyones:

la asosyasyon Fraternité d’Abraham (ermandad de Avraham) para la ermandad entre los ijos de Abraham ke son los djudyos, los kristyanos i los muzulmanos. Lo kuryozo es ke esta asosyasyon fue fundada el 7 de junyo 1967, a lo mas fuerte de la gerra de los sesh diyas, i el nasimyento se tuvo en la Grande Meshkita de Paris, kon Si Hamza Boubakeur (padre de Dalil), el padre Michel Riquet i André Chouraqui. Su prezidente fue Jacques Nantet, agora es Edmond Lisle.

En 2005 fue fundada la asosyasyon Amistad Djudeo-muzulmana, kon el haham Michel Serfaty i,  por la parte muzulmana, agora el imam Mohamed Azizi.

El tyempo me manka para dizirvos mas sovre el antisemitismo ande los muzulmanos i los esfuersos de estas dos asosyasyones para promover la paz entre djudyos i muzulmanos. Sera por una otra emisyon.

Al djueves ke vyene, si kyere el Dyo!

Edmond Cohen
Paris Fransya